| Владыко Господи Боже наш, древле ревнителя Илии пророка Твоего мольбу послушавый, и на время дождь удержати изволивый. И ныне человеколюбивый Творче и милостивый Господи, призри и на нас смиренных и недостойных рабов Твоих, приими наши смиренныя мольбы, и яко Щедр презри наша прегрешения и умолен быв от самаго Твоего человеколюбия, подаждь ведро достоянию Твоему, и солнце просвети на требующих и просящих от Тебе милости. Возвесели лице земли нищих ради людей Твоих, младенцев же и скотов и иных всех животных, ихже насыщаеши Твоим благоволением и даеши пищу им во благо время. Ей, Господи Боже наш, не отрини вотще мольбу нашу, и не посрами нас от чаяния нашего, но пощади нас по милости Твоей, и посети щедротами Твоими, исчезают бо всуе дние наши, и оскудевает в болезни жизнь наша. Не погуби убо нас беззаконий ради наших, имиже негодование и ярость Твою на себе привлекохом, но сотвори с нами по тихости Твоей, и по множеству милости Твоея. Се бо душею сокрушенною, и духом смиренным пред Тобою припадаем, и яко раби непотребнии, паче же большия казни достойнии, в покаянии умиленно Тебе вопием: согрешихом и беззаконновахом, и прегрешихом во всем, заповеди Твоя преступающе и сего ради вся, яже наводиши на нас, истиною и судом наводиши. Но не до конца тлению, гладу же и погибели предаждь нас, и да не потопит нас буря водная, но во гневе милости помяни, и туне щедрот Твоих ради умилостивися, и Твое создание и дело рук Твоих яко Благ помилуй, и от всякаго зла скоро избави. Тебе бо свойственно есть миловати и спасати нас, Боже наш, и Тебе славу возсылаем, Отцу и Сыну и Святому Духу, ныне и присно и во веки веков.
|
